3RD DAY MISA DE GALLO DEC 18

ANG PANDAY

Ang trabaho sa akong papa nga mao ang nakahuman kanamong iyang mga anak mao ang pagpamanday o carpentero.ang pagpamanday mao ang nakapadayon sa pagsuporta sa among pamilya. Sa akong nasinati, grabe ang iyang pag antos tungod kay usahay dili  na intawon siya makapalit ug sinina aron  lang maka eskwela kami. Makaingon ko nga ang akong papa mao ang pinaka dabest sa tanang papa tungod kay maayo kaayo siya alang kanamong tanan, bisan gani sa mga tawo nga mga lumad (aduna man gud daghang lumad sa among dapit). Adunay kaisa nga nagtan aw ko ug salida sa tv ug gitrangkahan nako ang pultahan aron ako maka concentrate sa pagtan aw, gipa abrihan gayod ni papa tungod kay aduna kunoy motan aw nga mga lumad.

Mga igsoon si San Jose usab usa ka panday, masinugtanon siya sa kabubut on sa Dios ug mituman sa iyang mga sugo. Tungod sa pagsulti sa Dios pinaagi sa damgo mikagiw siya uban ni Maria ug Hesus didto sa Ehipto aron sa pagprotecta sa batang Hesus. Iyang napadako si Hesus nga usa ka maayong tawo ug maayong Dios.

Ang ato usab nga Dios Amahan nagpadala sa iyang bugtong anak nganhi sa kalibutan aron sa pagluwas kanato. Kini nagpakita sa iyang dakong gugma kanatong iyang mga binuhat.

Karon nga adlaw ang atong tema mao "ang berhin Maria ug ang mga Amahan. Ang usa ka amahan mao ang gitawag nato ug haligi sa panimalay. Siya ang nagbantay aron maprotektahan ang kaligdong sa pamilya.  Siya ang naningkamot aron sa pagtukod ug pagpalambo sa pamilya. Siya usab ang naningkamot sa paghatag sa panginahanglanon sa pamilya. In other words siya ang nagpanday sa pamilya.

Kinahanglan nga ang panday kompleto ug mga kagamitan sama pananglit sa martelyo, gabas, metrosan, sapilya ug uban pa. dili man ikaw matawag ug panday kon wala ikaw’y gamit. Ingon ani usab unta ang tanang amahan, kompleto sa kagamitan aron mapanday pag-ayo ang pamilya. Kinahanglan nga hanas sila sa pagtukod ug maayo nga pamilya.

Busa karon niining atong pagpadayon  sa pagpaabot sa pagkatawo sa Ginoo, kita gihagit, ilabi na ang mga amahan sa paghatag ug bili diha sa pamilya . ang maayong amahan dili lamang mag atiman sa mga kabataan kon dili magpakabana  usab sa panginahanglan sa iyang palibot. Kini nga hagit dili lamang sa mga amahan kon dili alang usab sa tanan. Gihagt kitang tanan nga motukod ug maayong pamilya diha sa katilingban. gihagit kita nga mamahimong sama sa amahan nga maoy tigpanday sa pamilya.

Si papa panday, Si Jose panday usab, ang atong Dios Amahan mao usab ang nagpanday o nagbuhat sa kinabuhi sa tawo. Sana tayo din ay magiging Panday sa ating buhay at sa buhay nang iba.